فوتو: اشىق دەرەككوز
«جولداۋدا زاڭناماعا شاعىن كاسىپكەرلىك سۋبەكتىلەرىن ىرىلەندىرۋگە ىنتالاندىراتىن وزگەرىستەر ەنگىزۋدى تاپسىردىم. سالىق شارالارى, تەكسەرۋشى ورگانداردىڭ تاراپىنان جۇرگىزىلەتىن تەكسەرۋلەرگە بەلگىلى ءبىر يممۋنيتەت قالىپتاستىرۋ, سونداي-اق مامانداندىرىلعان قولداۋ قۇرالدارى مەن مەملەكەتتىك تاپسىرىستارعا قول جەتكىزۋ وسى ىنتالاندىرۋ شارالارىنىڭ قاتارىنا كىرۋگە ءتيىس.
مىسالى, مەملەكەتتىك قارجىلىق قولداۋدىڭ ەرەكشە شارالارىن ۇسىنۋ, سونداي-اق ستاندارتتى سالىق رەجيمىندە جۇمىس ىستەيتىن بيزنەس ءۇشىن مەملەكەتتىك تەندەرلەرگە جەڭىلدىكپەن قول جەتكىزۋ ماسەلەلەرىن پىسىقتاۋ كەرەك», دەدى مەملەكەت باسشىسى.
پرەزيدەنتتىڭ ايتۋىنشا, ەلىمىزدە قانداي دا ءبىر قيىندىقتارعا قاراماستان, مەملەكەتتىڭ قولداۋىنسىز تابىستى دامىپ, ەكسپورتتىق نارىقتاردى يگەرىپ جاتقان بىرنەشە ءجۇز عانا ورتا كاسىپورىن بار. بۇل رەتتە, ولاردىڭ كوبى تەكسەرۋشى ورگانداردىڭ قۋدالاۋىنان قورقىپ, وسى ۋاقىتقا دەيىن مەملەكەتتىك كومەكتەن باس تارتقان.
«بۇل جەردە ارنايى ءتاسىل كەرەك. ەگەر بيزنەس ءوز مىندەتتەمەلەرىن ورىنداپ جاتسا جانە كوزدەگەن ماقساتتارىنا قول جەتكىزسە, وندا بىردە-ءبىر تەكسەرۋشى جوبانى ىسكە اسىرۋ كەزەڭىندە دە, ودان كەيىن دە وعان كەدەرگى كەلتىرمەۋگە ءتيىس», دەدى ەل پرەزيدەنتى.
سونىمەن قاتار مەملەكەت باسشىسى كەيدە بيزنەستى كاسىپكەرلىكپەن اينالىسۋ ءۇشىن ەمەس, مەملەكەتتىك قولداۋعا يە بولۋ ماقساتىندا قۇراتىن جاعدايلار كەزدەسەتىنىن ايتتى. ناتيجەسىندە مەملەكەتتىك قولداۋ شارالارىنىڭ ەكونوميكالىق قايتارىمى جۇمسالعان بيۋدجەت قارجىسىنىڭ كولەمىنە ساي كەلمەيدى.
«2015-2021 جىلدارى بيزنەستى مەملەكەتتىك قولداۋ كولەمى (7 ترلن تەڭگە) قولداۋعا يە بولعان كومپانيالاردان تۇسكەن سالىق تۇسىمدەرىنىڭ سوماسىنان 1,5 ەسە اسىپ ءتۇستى (4,5 ترلن تەڭگە). مۇنداي جاعداي جىل سايىن قايتالانادى. بيزنەستى ىنتالاندىرۋ تاسىلدەرىن وزگەرتۋگە باعىتتالعان بۇعان دەيىنگى ارەكەتتەر ءساتسىز بولدى.
وسىعان بايلانىستى ۇكىمەتكە قولداۋ شارالارىنا قاتىستى تەتىكتەردى ساپالى تۇردە جاڭعىرتۋدى تاپسىرامىن», دەدى قاسىم-جومارت توقاەۆ.
